For bedrifter
Bedrifta betaler ikkje for å bli sett. Ho er med på å byggje beredskapen til Noreg.
Det byrjar lokalt. Eitt menneske, ei bedrift og ein kommune om gongen.
Bedrifta betaler ikkje for logoar, reklameplass eller særbehandling. Bidraget går til å få den første lokale piloten gjennomført, følgd opp og dokumentert. Målet er å utvikle ein modell som seinare kan takast i bruk av kommunar i heile landet.
Kommunen signerer avtalen og eig oversikta, fordi det er kommunen som er ansvarleg for henne. Målet er at kommunen ikkje skal betale for den første piloten, og det er ikkje på plass enno.
Kva pengane går til
Eit konkret pilotarbeid på seks månader i éin kommune, til fast pris. Ikkje ei generell støtte, og ikkje eit prosjekt utan ende.
- Oppsett av den avgrensa piloten: register, område og driftsrytme på plass saman med kommunen.
- Lokal kartlegging og registrering: kampanjen som får folk, lag og bedrifter inn i oversikta.
- Opplæring av kommunen sin operatør, altså den som har ansvar for oversikta, og av kriseleiinga.
- Ei felles samling eller øving, medrekna papirlistene og telefonkjeda.
- Drift og oppfølging gjennom heile pilotperioden.
- Ein skriftleg rapport med resultat og læring, som kommunen sit att med.
Kva ein pilot kostar står i pilotframlegget som blir sendt, ikkje på ei nettside. Kor mange bedrifter som skal vere med, og kor mykje kvar skal bidra med, er ikkje bestemt. Det er ein av tinga vi skal snakke om.
Kva pengar ikkje kan kjøpe
Dette er ikkje finskrift. Det er sjølve grunnen til at systemet verkar: blir det mogleg å kjøpe seg inn, sluttar det å vere sant, og då sluttar folk å møte opp.
-
Ikkje tilgang til personopplysningar
Bedrifta får aldri sjå namn, telefonnummer eller noko anna om folk i oversikta. De ser dykkar eiga oppføring og dykkar eigen innsats.
-
Ikkje innsyn i kven som er registrerte
Heller ikkje eit samletal, eit kart eller ei anonymisert liste. Kommunen sin operatør ser oversikta. Ingen andre.
-
Ikkje prioritet på frivillige eller lokale ressursar
Utvalet blir gjort på kva som trengst, og kven som har det. Aldri på kven som har betalt.
-
Ikkje kontroll over kommunen
Kommunen eig oversikta og bestemmer sjølv når og korleis ho blir brukt. Den som betaler for piloten, styrer ingenting av det.
-
Ikkje reklame inne i registeret
Oversikta er eit beredskapsverktøy for kommunen. Det er ingen flate å kjøpe synlegheit på, og det kjem ikkje til å bli det.
-
Ikkje eit SAMLO-merke som kan kjøpast
SAMLO deler ikkje ut merke, nivå eller titlar til nokon. Det einaste som blir ført, er kva bedrifta faktisk gjorde.
Bidraget er inngangsbilletten, ikkje pengane. Ei bedrift blir anerkjend for det ho faktisk har gjort, akkurat som eit menneske. Ei bedrift som aldri betalte ei krone, men som stilte med gravemaskin klokka to om natta, har gjort det som tel. Den som berre betalte, har ikkje gjort det.
Kva bedrifta får
Fem ting, og ingen av dei er synlegheit.
-
Ei oppføring som stemmer
Kva bedrifta faktisk har og kan bidra med: maskiner, køyretøy, aggregat, lokale, lager, fagfolk. Registrert éin gong, stadfesta éin gong i året.
-
Ei konkret rolle i den lokale piloten
De veit kva de er med på, kva de kan bli spurde om, og kva de kan seie nei til. Eit nei kostar ingenting og skal ikkje forklarast.
-
Plass på den felles samlinga eller øvinga
Der møter de dei andre som har meldt seg, og de ser kva som faktisk manglar når noko skal gjerast.
-
Dokumentasjon på at de gjorde piloten mogleg
Skriftleg, datofesta og nøktern. De kan bruke han der de sjølve vil bruke han.
-
Eit lokalsamfunn som er betre førebudd
Òg når bedrifta sjølv blir råka. Ryk vegen, kjem folka dykkar korkje til eller frå eigen arbeidsplass.
I tillegg kan ei bedrift bli nemnd nøkternt i pilotrapporten, som ei av bedriftene som gjorde piloten mogleg. Det er ei setning i eit dokument. Ikkje ein logovegg, og ingen pakke med nivå og prisar. Det er heller ikkje eit kvalitetsstempel: ingen tredjepart har vurdert noko, og det seier berre at bedrifta var med. Om ei roleg takkelinje skal stå ein stad seinare, blir ho aldri lagd inne i oversikta og aldri hovudpoenget.
Kva dette ikkje er
Dette er ikkje beredskapsrådgjeving for bedrifta dykkar. De får ikkje ein eigen gjennomgang, ein eigen analyse, ein skreddarsydd rapport eller eit eige risikoarbeid som del av å finansiere piloten. Vi kunne lova det, men SAMLO blir bygd av éin person, og det som blir lova til kvar enkelt bedrift, blir teke frå piloten.
Ei full beredskapskartlegging for éi enkelt bedrift kan bli ei eiga betalt teneste seinare. Det er i så fall ein annan samtale, og det er ikkje ein føresetnad for å vere med på piloten.
Kvar prosjektet står
Ingen kommune har signert enno, og SAMLO har ikkje vore brukt under ei ekte hending. SAMLO AS er under etablering, og fram til selskapet er registrert står Steffen Valle Øvrebø bak prosjektet gjennom byvalle. Den bedrifta som blir med no, blir med tidleg, og det er noko anna enn å kjøpe noko som er ferdig.